ખેડૂતો માટે મોટી રાહત: ટ્રેક્ટર ખરીદી પર હવે મળશે ₹1 લાખ સુધી સહાય

ગુજરાતના ખેડૂતોને આધુનિક ખેતી તરફ આગળ વધારવા રાજ્ય સરકારે મહત્વપૂર્ણ પગલું ભર્યું છે. કૃષિ યાંત્રીકીકરણને પ્રોત્સાહન આપવા માટે ખેડૂતોને ટ્રેક્ટર અને અન્ય કૃષિ મશીનરી ખરીદી પર મોટી આર્થિક સહાય આપવામાં આવી રહી છે. આ નિર્ણયથી ખેતીમાં ટેક્નોલોજીનો ઉપયોગ વધે અને ખેડૂતનો ખર્ચ ઘટે તેવો સરકારનો મુખ્ય હેતુ છે. Tractor Subsidy Scheme

આજના સમયમાં પશુચાલિત સાધનોની જગ્યાએ ટ્રેક્ટર, રોટાવેટર અને અન્ય આધુનિક મશીનોનું મહત્વ વધી ગયું છે. પરંતુ આ મશીનોની ઊંચી કિંમતને કારણે ઘણા ખેડૂતો ખરીદી કરી શકતા નથી. એ સ્થિતિમાં સરકારની સહાય ખેડૂતો માટે મોટી મદદરૂપ બની રહી છે.

ટ્રેક્ટર ખરીદી માટે વધારેલી સહાય

ચાલુ વર્ષ 2025–26 માટે રાજ્ય સરકારે ટ્રેક્ટર ખરીદી સહાયમાં મોટો વધારો કર્યો છે. હવે ખેડૂતોને ટ્રેક્ટરની કુલ કિંમતના 25 ટકા અથવા મહત્તમ ₹1,00,000 — બંનેમાંથી જે ઓછું હોય તે મુજબ સહાય મળશે.

અગાઉ આ મર્યાદા ₹45,000 અને ₹60,000 સુધી હતી, પરંતુ હવે વધારાથી ખેડૂતોને વધુ આર્થિક રાહત મળશે. આ પગલું ખાસ કરીને નાના અને મધ્યમ ખેડૂતો માટે ઉપયોગી સાબિત થવાનું માનવામાં આવે છે.

80,000 ખેડૂતોને સહાય આપવાનો લક્ષ્યાંક

રાજ્ય સરકારે આ વર્ષે ટ્રેક્ટર ખરીદી માટે 80,000 ખેડૂતોને સહાય આપવાનો લક્ષ્યાંક રાખ્યો છે. આ માટે અંદાજે ₹800 કરોડની જોગવાઈ કરવામાં આવી છે, જે ગત વર્ષની સરખામણીએ લગભગ બમણી છે.

કૃષિ વિભાગના આંકડા મુજબ અત્યાર સુધીમાં લગભગ 76,000 ખેડૂતોને પૂર્વ મંજૂરી હુકમ આપવામાં આવી ચૂક્યો છે. એટલે મોટા પાયે ખેડૂતોને સહાયનો માર્ગ ખુલ્યો છે.

અન્ય કૃષિ મશીનરી માટે પણ મોટી જોગવાઈ

ટ્રેક્ટર ઉપરાંત કંબાઈન હાર્વેસ્ટર, પાવર ટીલર, રોટાવેટર, ઓટોમેટિક ઓરણી, પ્લાઉ અને થ્રેશર જેવા સાધનો માટે પણ રાજ્ય સરકારે ₹590.98 કરોડની જોગવાઈ મંજૂર કરી છે.

વિવિધ ખેત ઓજારોની ખરીદી માટે રાજ્યભરમાં 1,16,700થી વધુ ખેડૂતોને પૂર્વ મંજૂરી આપવામાં આવી છે. કુલ મળીને ટ્રેક્ટર સહિતની મશીનરી માટે 1,92,700થી વધુ ખેડૂતોને લાભ માટે ગ્રીન સિગ્નલ આપવામાં આવ્યું છે.